دنیا مری نظر سے تجھے دیکھتی رہی

دنیا مِری نظر سے تجھے دیکھتی رہی 

پھر میرے دیکھنے میں بتا کیا کمی رہی 

کیا غم اگر قرار و سکوں کی کمی رہی 

خوش ہوں کہ کامیاب مِری زندگی رہی 

اک درد تھا جگر میں جو اٹھتا رہا مدام 

اک آگ تھی کہ دل میں برابر لگی رہی 

دامن دریدہ، لب پہ فغاں، آنکھ خونچکاں 

گر کر تِری نظر سے مِری بےکسی رہی 

آئی بہار، جام چلے، مے لُٹی،۔ مگر 

جو تشنگی تھی مجھ کو وہی تشنگی رہی 

کھوئی ہوئی تھی تیری تجلی میں کائنات 

پھر بھی مِری نگاہ تجھے ڈھونڈتی رہی 

جلتی رہیں امید کی شمعیں تمام رات 

مایوس دل میں کچھ تو ضیاؔ روشنی رہی 

ضیا فتح آبادی