آئی ہے کچھ نہ پوچھ قیامت کہاں کہاں

آئی ہے کچھ نہ پوچھ قیامت کہاں کہاں

اُف، لے گئی ہے ہم کو محبت کہاں کہاں

بے تابی و سکوں کی ہوئیں منزلیں تمام

بہلائیں تجھ سے چھٹ کے طبیعت کہاں کہاں

راہِ طلب میں چھوڑ دیا دل کا ساتھ بھی

پھِرتے لیے ہوئے یہ مصیبت کہاں کہاں

بے گانگی پہ اسکی زمانے سے اعتراض 

درپردہ اس ادا کی شکایت کہاں کہاں

فرق آ گیا تھا دورِ حیات و ممات میں 

آئی ہے یاد آج وہ صورت کہاں کہاں

ہوش و جنوں بھی اب تو بس اک بات ہیں فراقؔ

ہوتی ہے اس نظر کی شرارت کہاں کہاں

فراق گورکھپوری