میں غیر ہوں دل سے یہ کھٹک جائے تو اچھا

میں غیر ہوں دل سے یہ کھٹک جائے تو اچھا

دل اس کا مِرے دل سے اٹک جائے تو اچھا

عاشق پہ تِرے اب سرِ شوریدہ گراں ہے

لا کر تِرے در پر جو پٹک جائے تو اچھا

اس کے دہنِ تنگ سے دل تنگ بہت ہے

غنچے سے یہ کہہ دو کہ چٹک جائے تو اچھا

بے کار دل الٹا، مِرے پہلو میں پڑا ہے

اس زلف کے سر ہو کے لٹک جائے تو اچھا

اے حسرتِ نظارا پڑے خوب یہ کانٹے

دم حلق میں کچھ دیر اٹک جائے تو اچھا

اتنا تو میں بدلوں کہ نہ پہچان سکے وہ

کچھ اور مِرا جسم جھٹک جائے تو اچھا

مۓ خانے سے مسجد کو چلا شوقؔ، یہ دیکھو

رستے میں جو کم بخت بھٹک جائے تو اچھا

شوق قدوائی