ہے غنیمت یہ فریب شب وعدہ اے دل

ہے غنیمت، یہ فریبِ شب وعدہ، اے دل

کیا کوئی دے گا تجھے اس سے زیادہ اے دل

مدتوں جان چھڑکتے رہے جس لمس پہ وہ

اوڑھ کر آ گیا خوشبو کا لبادہ اے دل

اب بھی روشن کیے بیٹھا ہے امیدوں کے چراغ

کتنا معصوم ہے تُو، کتنا ہے سادہ اے دل

خون سے لتھڑے ہوئے لاشے ہیں نقوشِ کفِ پا

اور کر منزلِ جاناں کا ارادہ اے دل

خود فریبی کا فسوں تجھ پہ ہے کاری، ورنہ

کم نہیں ہے شبِ غم سے شبِ وعدہ اے دل

رضا ہمدانی