وقت کی رو کو حقیقت نہ سمجھ لیجیے گا​

وقت کی رو کو حقیقت نہ سمجھ لیجئے گا​

اس سیاست کو سیاست نہ سمجھ لیجئے گا​

یہ تعلق ہے ابھی وجہِ تعلق تو کھُلے​

ملِنے جُلنے کو محبت نہ سمجھ لیجئے گا​

یہ بھی ممکن ہے سنبھلتا نہ ہو دستار کا بوجھ​

سر جھکانے کو عقیدت نہ سمجھ لیجئے گا​

جاگتی آنکھوں اگر خواب نظر آتے ہوں​

ان کی تعبیر کو وحشت نہ سمجھ لیجئے گا​

ایک ہی کھیل تو ہے جس میں نہیں جاں کا زیاں​

دل کی بازی کو سیاست نہ سمجھ لیجئے گا​

عرض کر سکتا ہوں میں بھیک نہیں مانگوں گا​

میری خواہش کو ضرورت نہ سمجھ لیجئے گا​

یہ تو پیرایۂ اِظہارِ سخن ہے محسن​ؔ

میری عادت کو ارادت نہ سمجھ لیجئے گا​

محسن بھوپالی