عشق لامحدود جب تک رہنما ہوتا نہیں

عشق لا محدود جب تک رہنما ہوتا نہیں

زندگی سے زندگی کا حق ادا ہوتا نہیں

بے کراں ہوتا نہیں، بے انتہا ہوتا نہیں

قطرہ جب تک بڑھ کے قلزم آشنا ہوتا نہیں

زندگی اک حادثہ ہے،۔ اور ایسا حادثہ

موت سے بھی ختم جس کا سلسلہ ہوتا نہیں

درد سے معمور ہوتی جا رہی ہے کائنات

اک دلِ انساں مگر درد آشنا ہوتا نہیں

اس مقامِ قرب تک اب عشق پہنچا ہے جہاں

دیدہ و دل کا بھی اکثر واسطہ ہوتا نہیں

اللہ، اللہ، یہ کمالِ ارتباطِ حُسن و عشق

فاصلے  ہوں لاکھ دل سے دل جدا ہوتا نہیں

وقت آتا ہے اک ایسا بھی سرِ بزمِ جمال

سامنے ہوتے ہیں وہ اور سامنا ہوتا نہیں

کیا قیامت ہے کہ اس دورِ ترقی میں جگرؔ

آدمی سے آدمی کا حق ادا ہوتا نہیں

جگر مراد آبادی