فتنہ روزگار میں امن ہے کیا، قرار کیا

فتنۂ روزگار میں، امن ہے کیا، قرار کیا

حاصلِ زیست غم سہی، غم کا بھی اعتبار کیا

عشق کمالِ عشق ہے، ہوش سے ننگ و عار کیا

سینۂ چاک چاک کر، دامنِ تار تار کیا

دیدہ و دل پہ کس کا بس، جان پہ اختیار کیا

ہو چکے ان کے جب ہمیں، ان پہ کریں نثار کیا

تیری نصیحتیں بجا، یہ تو بتا، اے ناصحا

اور ہے عشق کے سوا، مقصدِ حسن یار کیا

عشقِ خزاں مزاج سے لطفِ جمال پوچھیۓ

جن کی نظر ہے خود بہار، ان کے لیے بہار کیا

ناز سے مسکرا کے دیکھ ، چشم حیا اٹھا کے دیکھ

دل سے حریف کے لیے، نیچی نظر کا وار کیا

سوزِ تمام چاہیۓ، رنگِ دوام چاہیۓ

شمعِ تہِ مزار ہو، شمع سرِ مزار کیا

کارِ عظیم چاہیۓ، طبعِ سلیم چاہیۓ 

عزمِ صمیم چاہیۓ، فکرِ مآل کار کیا

میں نے کیا ہے جرمِ عشق، مجھ سے ہوئی خطائے شوق

خواہشِ عفو کس لیے، بخششِ حسنِ یار کیا

فطرتِ شوق کی قسم، غیرتِ عشق کی قسم

دولت دو جہاں سہی، دولتِ مستعار کیا

منزلِ عشق میں جگؔر غیر تو پھر غیر ہیں

دل پہ بھی اعتماد کیوں، اپنا بھی اعتبار کیا

جگر مراد آبادی