مِرے خوابوں کے قتلِ عام کی ساری کہانی
مِرے اپنوں نے خوشیوں کے ہمالے سے
اترتا، رقص کرتا، بیش قیمت، قہقہوں کا بار ور پانی
مِرے دشمن کے ہاتھوں سستے داموں بیچ ڈالا ہے
اور، اب
ڈوبتے سورج کا منظر دیکھ کر
روتا ہُوا، یہ سوچتا ہوں
ایک دِن آنکھوں کا پانی بھی روانی بھول جائے گا
مِرے خوابوں کے قتلِ عام کی ساری کہانی بھول جائے گا
مِرے دشمن کی سانسیں ہنستے ہنستے پھول جائیں گی
مِری آنکھوں میں رہ جائے گی سوکھی ریت
جس کو شہر والے
اپنے اپنے خواب کی بنیاد رکھنے میں کھپا دیں گے
مِرے ہونے کی اَدھ موئی نشانی تک مٹا دیں گے
کفِ تخریب سے تعمیر کی امید کرتا ہوں
میں گویا یومِ عاشورہ کو یومِ عید کرتا ہوں
احمد حماد
No comments:
Post a Comment