آنسو سارے زخم پرانے دھو سکتا ہے

آنسو سارے زخم پرانے دھو سکتا ہے

پانی ہی پانی کے جیسا ہو سکتا ہے

اِن آنکھوں کی گہرائ سے ڈر جاتی ہوں

کاجل بھی آنکھوں میں جا کر کھو سکتا ہے

رات کو دیکھا خواب کئی تھے خواب کے اندر

خواب میں کوئی کتنے خواب سمو سکتا ہے

جانے کیسی آنکھ تھی بنجر صحرا جیسی

کوئی بنا اشکوں کے کیسے رو سکتا ہے

چاند تھکن سے چور ندی میں چھپ جائے تو

بادل سے بھی آنکھ بچا کر سو سکتا ہے

ساحل سے سورج کا رشتہ جیسا بھی ہو

ایک سمندر کتنے سورج بو سکتا ہے

کچھ تو وصل کی اوس میں بھیگیں آپ بھی صاحب

کب تک ساون دامنِ ہجر بھگو سکتا ہے

راہگزر کے نقشِ قدم آنکھوں میں رکھنا

منزل تک آ کر بھی رستہ کھو سکتا ہے

رات گئی سو بات گئی اب چھوڑ بھی یارا 

پچھلی باتوں پر تُو کتنا رو سکتا ہے

آئینے سے روز الجھ پڑتی ہوں سیماؔ

کوئی خود پر کیسے عاشق ہو سکتا ہے

سیما نقوی