در ستارۂ دمدار کر کے وا کوئی

نذر جمال احسانی 

درِ ستارۂ دُم دار کر کے وا کوئی 

عجب ادا سے مجھے دیکھتا رہا کوئی

گواہی دے رہے ہیں خود نقوشِ پا سرِ دشت

اِدھر سے گزرا ہے پہلے بھی قافلہ کوئی

دعائیں بیچنے والے! چل اس نگر سے نکل

یہاں تو مفت بھی لیتا نہیں دعا کوئی

ہے یوں تو دہر میں کتنوں سے آشنائی مِری

پر، آئینے سا نہیں دیر آشنا کوئی

اسی لیے تو ہوں ساحؔر بجھا بجھا سا میں 

مِری طرح کا نہیں اور دل جلا کوئی

پرویز ساحر