کب لطف زبانی کچھ اس غنچہ دہن کا تھا

کب لطف زبانی کچھ اس غنچہ دہن کا تھا

برسوں ملے پر ہم سے صرفہ ہی سخن کا تھا

اسباب مہیا تھے سب مرنے ہی کے لیکن

اب تک نہ موئے ہم جو اندیشہ کفن کا تھا

بلبل کو مؤا پایا کل پھولوں کی دکاں پر

اس مرغ کے بھی جی میں کیا شوق چمن کا تھا

مرغانِ چمن سارے تسبیح میں تھے گل کی

ہر چند کہ ہر اک کا ڈھلکا ہوا منکا تھا

سب سطح ہے پانی کا آئینے کا سا تختہ

دریا میں کہیں شاید عکس اس کے بدن کا تھا

خوگر نہیں ہم یوں ہی کچھ ریختہ کہنے سے

معشوق جو اپنا تھا باشندہ دکن کا تھا

رہ میؔر غریبانہ جاتا تھا چلا روتا

ہر گام گِلہ لب پر یارانِ وطن کا تھا

میر تقی میر