مرے کمرے کی کھڑکی سے

دائرہ در دائرہ

مِرے کمرے کی کھڑکی سے

مجھے اک اور کھڑکی

رات اور دن دیکھتی ہے

اس کی آنکھوں کی نمی مجھ کو

کچھ ایسے نم سی رکھتی ہے

مِرے کمرے میں بارش

ہونے لگتی ہے

میں اس کی تیز دھاروں میں

بدن اپنا بھگوتی ہوں

میں اتنا انچا روتی ہوں

مِرے کمرے کی دیواریں

اٹھا کر آنکھ

مجھ سے پوچھتی ہیں

کون رویا ہے؟

میں اس کھڑکی کی جانب

ہاتھ کی انگلی اٹھاتی ہوں

مگر

اس ایک لمحے کے کسی حصے میں

کوئی مجھ سے یہ

سرگوشی میں کہتا ہے

وہاں تو آئینہ رکھا ہوا ہے

آئینوں کے پیچھے ایک دنیا ہے

جہاں کچھ سائے بستے ہیں

سماعت سے ہیں جو عاری

جہاں کچھ الجھے رستے ہیں

کہیں پر جو نہیں جاتے

مگر

مجھ کو لیے پھرتے ہیں

اک ایسے سفر میں

دائرہ در دائرہ چلتا ہے

اور رکتا نہیں

شاہدہ دلاور شاہ