اور آہستہ کیجیے باتیں دھڑکنیں کوئی سن رہا ہو گا

گیت

 اور آہستہ کیجیۓ باتیں

دھڑکنیں کوئی سن رہا ہو گا

لفظ گرنے نہ پائے ہونٹوں سے

وقت کے ہاتھ ان کو چن لیں گے

کان رکھتے ہیں یہ در و دیوار

راز کی ساری بات سن لیں گے

اور آہستہ کیجیۓ باتیں

دھڑکنیں کوئی سن رہا ہو گا

ایسے بولو کہ دل کا افسانہ

دل سنے اور نگاہ دہرائے

اپنے چاروں طرف کی یہ دنیا

سانس کا شور بھی نہ سن پائے

اور آہستہ کیجیۓ باتیں

دھڑکنیں کوئی سن رہا ہو گا

آئیے بند کر لیں دروازے

رات سپنے چرا نہ لے جائے

کوئی جھونکا ہوا کا آوارہ

دل کی باتوں کو اڑا نہ لے جائے

اور آہستہ کیجیۓ باتیں

دھڑکنیں کوئی سن رہا ہو گا

آج اتنے قریب آ جاؤ

دھڑکنوں کا کہیں نشاں نہ رہے

ایسے اک دوسرے میں گم ہو جائیں

فاصلہ کوئی درمیاں نہ رہ جائے

اور آہستہ کیجیۓ باتیں

دھڑکنیں کوئی سن رہا ہو گا

ظفر گورکھپوری