کہسارِ تغافل کو صدا کاٹ رہی ہے
حیراں ہوں کہ پتھر کو ہوا کاٹ رہی ہے
پیشانئ ساحل پہ کوئی نام نہ اُبھرے
ہر موج سمندر کا لکھا کاٹ رہی ہے
الفاظ کی دھرتی پہ ہوں مفہوم گزیدہ
اب جسم پہ کاغذ کی قبا کاٹ رہی ہے
ہر روح پسِ پردۂ ترتیبِ عناصر
ناکردہ گناہوں کی سزا کاٹ رہی ہے
فن کار کا خوں دامنِ تخلیق پہ گویا
تصویر مصور کا گَلا کاٹ رہی ہے
محجوب ہیں مغرور درختوں کی قطاریں
ہر شاخ کو شمشیرِ انا کاٹ رہی ہے
جمنا پرشاد راہی
No comments:
Post a Comment