دل کی آغوش میں پل کر جو جواں ہوتا ہے
کب بھلا درد وہ لفظوں میں بیاں ہوتا ہے
چلمنوں میں اسے پلکوں کی چھپا کر رکھنا
جو نہاں دل میں ہو آنکھوں سے عیاں ہوتا ہے
رائیگاں ہے جو تِرے بعد گزاری میں نے
کیا تجھے بھی یہی احساس زیاں ہوتا ہے؟
نفع نقصان گنیں کیوں یہ تجارت تو نہیں
عشق ہے عشق میں کب سود و زیاں ہوتا ہے
یوں مری عمر گذشتہ کے مہ و سال کٹے
جیسے ندیا میں سبک آب رواں ہوتا ہے
شاہدہ مجید
No comments:
Post a Comment