جس کی خاطر میں ہمیشہ ہی دعا کرتی ہوں

جس کی خاطر میں ہمیشہ ہی دُعا کرتی ہوں

اپنی ہر سانس بھی اس پہ میں فدا کرتی ہوں

مجھ کو سُولی سے ڈراتے ہیں زمانے والے

ہے مِرا جُرم یہی کہ میں وفا کرتی ہوں

چھوڑ جانا نہ کہیں راہِ وفا میں مجھ کو

بن کے سائل تِرے در پہ یہ صدا کرتی ہوں

جان رکھتی ہوں ہتھیلی پہ سجا کر ہر پل

میں تو یوں فرض محبت کا ادا کرتی ہوں

جسم سے جان نکلتی ہے ہمیشہ اس پل

جب بھی اس شخص کو خود سے میں جدا کرتی ہوں

چھوڑ دیتی ہوں سبھی کچھ ہی خدا کے اوپر

دل کے زخموں کی بھلا کب میں دوا کرتی ہوں

میں ہوں انسان، فرشتہ تو نہیں ہوں تسنیم

معاف کرنا اے خدا! جو بھی خطا کرتی ہوں

سیدہ تسنیم بخاری