مجھ میں تنہائی مری اور میں تنہائی میں

مجھ میں تنہائی مِری اور میں تنہائی میں

اجنبی ہو گئے سب دشتِ شناسائی میں

اپنے اندر ہی رعونت کی فضا ہے شاید

لوگ اترتے ہی نہیں روح کی گہرائی میں

کھل گیا اب کہ ہے آداب محبت بڑی چیز

ہم جو معروف ہوئے جلوۂ رسوائی میں

یہ تو طے ہے کہ مجھے تجھ سے جدا ہونا ہے

مثل آنسو ہوں تِری چشمِ 👁 تمنائی میں

آپ تو حشر اٹھانے کے لیے کہتے تھے

آنکھ تک اٹھ نہ سکی عالمِ رُسوائی میں

عمر کاٹی ہے اسی ایک طلب میں آفاق

اک نظر دیکھ لے مجھ کو کوئی تنہائی میں

مقصود آفاق