آشفتہ سرے، آبلہ پائے، کوئی آئے
اک شہر ہے نظروں کو بچھائے کوئی آئے
سکھلائے جو تہذیبِ جنوں بے خبروں کو
مجنوں صفت، قیس نمائے کوئی آئے
کیا خوب ہو ٹھہرے جو شبِ تار سے پیکار
خورشید رخِ ماہ وشائے کوئی آئے
آ جائے ہے خط ایک نئے عذر کے ہمدوش
اے کاش کبھی خط کے بجائے کوئی آئے
پھر رنگِ محبت سے نکھر جائیں در و بام
برسات کی رُت کھینچ کے لائے کوئی آئے
کیا جانیے کیوں وردِ زباں ہے یہ تمنا
آئے، کوئی آئے، کوئی آئے، کوئی آئے
ہمراہِ صبا صحنِ گلستاں میں سحر دم
خوابیدہ گلابوں کو جگائے کوئی آئے
صبیحہ صبا
No comments:
Post a Comment