کب تک وہ محبت کو نبھاتا نظر آتا

 کب تک وہ محبت کو نبھاتا نظر آتا

اب میں بھی نہیں جان سے جاتا نظر آتا

تم تو مِری ہر سمت ہواؤں کی طرح ہو

موسم کوئی فرقت کا جو آتا نظر آتا

ہے روشنی اتنی کہ دکھائی ہی نہ کچھ دے

ورنہ ہمیں اس طاق میں داتا نظر آتا

چلتی ذرا تیزی سے ہوا تو میں پتنگیں

کچھ اور بلندی پہ اڑاتا نظر آتا

منظر میں تجسس ہے نہ جادو نہ کشش ہے

ہوتے تو یہ وہ خواب دکھاتا نظر آتا

میں وقت کی سوئی سے بندھا رہتا ہوں ورنہ

صحرا میں بہت ریت اڑاتا نظر آتا

آؤ، ذرا اس سمت سے دیکھو وہ زمیں ہے

ہر ایک ہے دوجے کو مٹاتا نظر آتا

ذیشان بتوں میں جو کوئی زندگی ہوتی

میں سب سے زبردست بناتا نظر آتا

ذیشان ساجد