ہم اپنی ہار کا یقین اب کسے دلائیں گے سمے کا داؤ سخت ہے

 سمے کا داؤ سخت ہے

عجیب بھیڑ ہے

دماغ کھچڑیوں سے بھر گئے

طبیب اپنی ہار سے ڈرے ہوئے

الگ تھلگ پڑے ہوئے ہیں بور سے

پکے پڑے ہیں کان دُکھ کے شور سے

ہر اک یقین ٹوٹنے کا وقت ہے

ان اجنبی سٹیشنوں پہ ان دنوں

پدھارتی ہر اک ٹرین نے نہیں لگام لی

سمے کی بوگیوں نے پٹڑیوں کا ساتھ چھوڑ کر 

عجیب سمت تھام لی

سکون چین لُوٹنے کا وقت ہے

کسے کہیں

ہماری بات کو سنے بھی کون غور سے

دماغ کام کر رہے ہیں انگلیوں کی پور سے

گزر رہی ہے کائنات ایک چُپ کے شور سے

ابھی تو زندگی لُبھا رہی ہے سب کو زور سے

سکوت میں پلے ہوئے جمود کے قریب سے گزر گئے

جنہیں تھی منزلوں کی چاہ، راہ میں اتر گئے

ہمی تو خواہشوں کے بارے ایک جا ٹھہر گئے

اسی لیے ہمارے ہاتھ نارسی سے بھر گئے

کٹے ہوئے ہیں روشنی کے باب سے

بھٹک رہے ہیں اپنے اجتناب سے

شعور چھوٹنے کا وقت ہے

سمے کی چاپ سنتے سنتے اس لیے بھی رو دئیے

کہ ہم نے ماس اپنے نیلے ناخنوں سے کھو دئیے

ہے شکر، یہ قلم کتاب ساتھ ہے وگرنہ ہم

کسی کی یاد کا رُباب ساتھ ہے وگرنہ ہم

گریز کی ندی کو پھاند کر دِیے اجالتے

سمے کے پار اپنی دیکھ بھال کو سنبھالتے

ہمیں یہ زعم تھا سمندروں کے دَل کھنگالتے

ہم اپنی ہار کا یقین اب کِسے دلائیں گے

سمے کا داؤ سخت ہے

جمود کی کرختگی کے پُھوٹنے کا وقت ہے

حنا عنبرین