حدِ یقیں پہ شورِ گماں بولنے لگا
میں راکھ ہو چکا تو دھواں بولنے لگا
جب ہونٹ سی لیے تو عجب کیفیت ہوئی
سینے میں میرے دردِ نہاں بولنے لگا
جب قافلے کی گرد چھٹی رات ہو گئی
تو رازدارِ نوکِ سناں بولنے لگا
ان مفلسوں پہ کیسی قیامت گزر گئی
کچے گھروں پہ ابرِ رواں بولنے لگا
پاؤں میں عمر بھر کی تھکن بولنے لگی
کاندھے پہ کوئی بارِ گراں بولنے لگا
اس نے صدائے کُن سے اسے بخش دی زباں
اور سلسلۂ کون و مکاں بولنے لگا
جاوید تُو تو لفظ کو لکھنے میں طاق تھا
کیوں تیری شاعری میں زیاں بولنے لگا
سید جاوید
No comments:
Post a Comment