وقت وداعِ تیرہ شبی ہے گجر بجاؤ
دامانِ شب میں آگ لگی ہے گجر بجاؤ
پھوٹی شعاع نور، افق کی کمان سے
تاریکیوں کے دم پہ بنی ہے گجر بجاؤ
غنچے کھلے، نسیم چلی، جاگ اٹھے طیور
صحن چمن میں دھوم مچی ہے گجر بجاؤ
اب بھی نہیں کھلے گی تو پھر کب کھلے گی آنکھ
اے اہلِ ہوش، وقت یہی ہے گجر بجاؤ
یہ انقلابِ تازہ کی آمد کا وقت ہے
اب یہ ثبوتِ ہم نفسی ہے گجر بجاؤ
بام حرم سے شورِ اذاں پھر ہوا بلند
اے اہلِ دیر صبح ہوئی ہے گجر بجاؤ
اعلان عام صبح درخشاں کے باب میں
اب کیا مجال دم زدنی ہے گجر بجاؤ
خالد سپاہِ ظلمتِ شب ہے گُریز پا
اس وقت کا مزاج یہی ہے گجر بجاؤ
خالد علیگ
No comments:
Post a Comment