بکھرا ہوا ہے خوابِ گلستاں ترے بغیر

 بکھرا ہوا ہے خوابِ گلستاں تِرے بغیر

آ جا کہ زندگی ہے پریشاں ترے بغیر

جشنِ بہار و گل بھی ہیں سنساں پڑے ہوئے

اجڑی ہوئی ہے محفل دوراں ترے بغیر

نیندوں نے رتجگوں میں ٹھکانہ بنا لیا

روٹھی ہوئی ہے جنبشِ مژگاں ترے بغیر

ہر بوند تیری یاد سے معمور ہے یہاں

کیسے کٹے گا موسمِ باراں ترے بغیر

خوشیاں ہیں مِری تجھ سے ہی منسوب سن ذرا

اک پل بھی نہ رہوں گی میں شاداں ترے بغیر

تُو ہے غرور میری محبت کا ہمسفر

کیسے رہوں حیات پہ نازاں ترے بغیر

آئے ہیں کس دیار میں ہم بے حسی کےساتھ

خوش ہیں تِرے بِنا نہ پریشاں ترے بغیر

خوشبو اداس بیٹھی ہے کلیوں کی اوٹ میں

سونی پڑی ہے صبحِ بہاراں ترے بغیر

زبدہ ہے انتظارِ طلوعِ سحر مجھے

کیسے کروں میں دل میں چراغاں ترے بغیر

زبدہ خان