تھا سکوتِ مرگ طاری عمر بھر تالاب میں
توڑ ڈالے میرے ہنگاموں نے در تالاب میں
دائرہ در دائرہ ہے شور سطحِ آب پر
میں نے پھینکا ایک پتھر سوچ کر تالاب میں
سب تصور کے پرندے پر لگا کر اڑ گئے
نقرئی پریاں ہیں تا حدِ نظر تالاب میں
میرا پرتو، میرا چہرہ، میرے سارے رنگ ہیں
غور سے دیکھو دریچے سے اگر تالاب میں
میں نے ٹانکے تھے ستارے تیرے آنچل میں کبھی
جھلملاتے رہتے ہیں شمس و قمر تالاب میں
شب گزیدہ ساعتیں اب راہ میں پڑتی نہیں
نور ہے حدِ نظر روشن سحر تالاب میں
ڈوبتے سورج کا منظر ہے پسِ دیوارِ آب
کھنچتے جاتے ہیں شفق قلب و نظر تالاب میں
نیر رانی شفق
No comments:
Post a Comment