دیارِ چشمِ نمیدہ میں خشکبو نہ ہوئے
ہزار شکر مِرے رنج بے نمو نہ ہوئے
بدن کی خاک تیمم کے کام آتی رہی
نمازِ وحشتِ شب ہا کو بے وضو نہ ہوئے
بلائے خوف تِری ناخنی گرفت میں ہم
کچھ ایسے طور سے ادھڑے کہ پھر رفو نہ ہوئے
تِری قسم میں انہیں دیکھ دیکھ حیراں ہوں
جو تیرے پاس رہے اور گلاب خو نہ ہوئے
عجب یقین سے روشن ہیں میرے دیدہ و دل
شبِ نزولِ گماں بھی لہو لہو نہ ہوئے
دلوں پہ بھید اترتے ہیں طاق راتوں میں
مگر وہ دل جو کبھی رزقِ آرزو نہ ہوئے
زباں گرفت میں آئی تو آبرو پائی
زباں دراز سزاوارِ آبرو نہ ہوئے
کاشف شاہ
No comments:
Post a Comment