احترامِ صبا کیا جائے​ سب دریچوں کو وا کیا جائے

احترامِ صبا کیا جائے​

سب دریچوں کو وا کیا جائے​

کوئی شہرِ صبا سے آئے گا​

فرش کو آئینہ کیا جائے​

ساری نادانیاں تو اپنی ہیں​

کیا کسی کا گِلہ کیا جائے

​کیوں لیا جائے امتحان اس کا​

کیوں اسے بے وفا کیا جائے​

مشورے ٹھیک ہیں زمانے کے​

دل نہ مانے تو کیا کیا جائے​

صرف حرفِ دعا نہیں کافی​

دل کو صرفِ دعا کیا جائے​

پھر ہوا کا مزاج برہم ہے​

پھر کوئی مشورہ کیا جائے​

بحث و تمحیص کر چکے ہم تم​

اب کوئی فیصلہ کیا جائے​

کچھ نہیں ہے تو اس مسافر کو​

اب سپردِ خدا کیا جائے​

ساری دنیا سے جیت آئے ہیں​

اس قبیلے کا کیا کیا جائے​

اس کی تصویر گھر میں کیا رکھنی​

دل کو آراستہ کیا جائے​

کون دل میں اتر کے دیکھتا ہے​

اب گھروں کو بڑا کیا جائے​

خال و خد ہی نہیں تو کیوں اظہر

آئینہ آئینہ کیا جائے​

اظہر ادیب