الوداع اے حسرتوں کے زرد موسم الوداع
دل کو جینا آ گیا ہے، دردِ پیہم الوداع
اب ہمارا قلب ہے امید کا روشن دیا
تیرگی افسردگی اے چشمِ پُر نم الوداع
وصل، فرقت، غم، خوشی سب عارضی جذبات ہیں
وقتِ رُخصت گُل کو ہے پیغامِ شبنم، الوداع
شادمانی کے نظاروں کے تعاقب میں ہیں ہم
اے خزاں کے دور کے بے رنگ البم الوداع
جہل کی دیوی یہاں سے بھاگ جا واپس نہ آ
ہو نہیں سکتا ہے تیرا میرا سنگم، الوداع
یار کے اصرار پر تو چھوڑنا ہی تھا تجھے
اے مِرے جذبات کے خونخوار ضیغم الوداع
جب سے عامر رکھ دئیے سپنوں کی دنیا میں قدم
تب سے کہتے ہیں جہاں کے دام و درہم الوداع
عامر اظہر خان
No comments:
Post a Comment