یہ میرا شہر وفا اور میں اکیلا آدمی

یہ میرا شہرِ وفا اور میں اکیلا آدمی

میرے لاکھوں آشنا اور میں اکیلا آدمی

ایک ہی سر ہے جھکا سکتا ہوں کس کس کے لیے

ان گنت میرے خدا اور میں اکیلا آدمی

گھومتا پھرتا ہوں شاید مجھ سا کوئی آ ملے

غم کے میلے جا بہ جا اور میں اکیلا آدمی

ہر طرف جنگل ہی جنگل، بستیوں کے درمیاں

شیر، چیتے، اژدہا، اور میں اکیلا آدمی

اپنی تنہائی سے بھی ہوتی نہیں اب گفتگو

بے کراں قیدِ انا اور میں اکیلا آدمی

میرا سایا نہ مر جائے رات کے اس دشت میں

اتنا لمبا راستہ، اور میں اکیلا آدمی

اس کی رحمت کے ہزاروں در مگر وہ بے نیاز

میرے سو دستِ دعا اور میں اکیلا آدمی

درد کے الہام نازل ہو رہے ہیں دم بہ دم

دل کا یہ غارِ حرا اور میں اکیلا آدمی

مل کے حوا سے کیا آباد اسے میں نے قتیل

یہ جہاں میری عطا اور میں اکیلا آدمی

قتیل شفائی