نعت پاک مصطفیٰ شاعری کی جان ہے

 عارفانہ کلام حمد نعت منقبت

نعتِ پاکِ مصطفیٰؐ شاعری کی جان ہے

صاف لفظوں میں کہوں یہ مرا ایمان ہے

دوسری کوئی نظر تاب لا سکتی نہیں

رب کا جلوہ دیکھنا مصطفیٰؐ کی شان ہے

مصطفیٰ کی شان میں جو بھی گستاخی کرے

اس کے نطفے میں ضرور اصل کا فقدان ہے

اس سے بڑھ کر بھی کوئی شان ہو سکتی ہے کیا

شاہ کی امت میں ہوں کس قدر احسان ہے

کارگر ہو گا نہیں دوسرا کوئی علاج

نعت گوئی ہی مرے درد کا درمان ہے

مصحفِ یادِ نبی کی حفاظت کے لئے

میرا سینہ رحل ہے اور دل جزدان ہے

خلق گوید مشکل است بحرِ مقلوبُ المدید

ہاں مگر میرے لئے نسبتاً آسان ہے

شاعری کے باب میں یہ تعارف ہے سحر

نعت میری جان ہے نعت ہی پہچان ہے

سحر بلرامپوری

غلام جیلانی سحر