عارفانہ کلام حمد نعت منقبت
چلو تشنہ لبو جاری ہیں مے خانے محمدﷺ کے
چھلکتے ہیں مئے عرفاں سے پیمانے محمدﷺ کے
انہیں بخشا ہے تاج رحمت اللعالمیںﷺ حق نے
کرم سب پر ہیں اپنے ہوں کہ بیگانے محمدﷺ کے
علاجِ ذہن و جسم و روح ہوتا ہے، ادھر آؤ
زمانے سے نرالے ہیں شفا خانے محمدﷺ کے
وہ ہو بزمِ شریعت یا ہو عالم جذب و مستی کا
نرالا بانکپن رکھتے ہیں مستانے محمدﷺ کے
یہ سجدہ آج بھی کرتے ہیں تلواروں کی دھاروں پر
کہیں ڈرتے ہیں باطل سے یہ دیوانے محمدﷺ کے
وہ ہو بدر و حنین و کربلا یا قبلۂ اول
لہو سے داستاں لکھتے ہیں دیوانے محمدﷺ کے
جو حرف آنے کا خطرہ بھی ہو ناموسِ رسالت پر
تو جاں پر کھیل جاتے ہیں یہ پروانے محمدﷺ کے
سہیل ان کی ثناء کا حق ادا ہو ہی نہیں سکتا
حقیقت میں مراتب تو خدا جانے محمدﷺ کے
سید حشمت سہیل
No comments:
Post a Comment