گر نہ ہوتے آپ ہوتا قصۂ آدم نہیں

 عارفانہ کلام حمد نعت منقبت

گر نہ ہوتے آپﷺ ہوتا قصۂ آدم نہیں

چاند تارے کوہ دریا اور ہوتے ہم نہیں

میری نس نس میں سمایا مصطفیٰؐ کا عشق ہے

وہ خیالوں میں بسے ہیں یہ سعادت کم نہیں

کس ڈگر پر لے چلا ہے کھینچ کر یہ شوقِ دید

خار بے معنی نظر میں آبلوں کا غم نہیں

شہرِ یثرب ہر گھڑی روشن ہے میری چشم میں

گرچہ میرے سامنے ہے کوئی جامِ جَم نہیں

ہر طرف یلغار تو تاریکیوں کا ہے مگر

یہ چراغِ مصطفیٰﷺ ہو گا کبھی مدھم نہیں

دیکھ کر تو دم بخود ہیں اسوۂ رحمت لقب

دشمنوں سے بھی ہوئے آقاﷺ کبھی برہم نہیں

قربان علی آتش