عشق کے اپنے ضابطے ہیں میاں
اپنے بھی ان سے رابطے ہیں میاں
ہم اکیلے نہیں زمانے میں
ساتھ کتنے ہی قافلے ہیں میاں
چھاؤں لے کر قریب آ جاؤ
ہم کڑی دھوپ میں کھڑے ہیں میاں
سب نے مل کر ہمیں دغا دی ہے
جتنے ہمدرد بھی ملے ہیں میاں
دیکھتے ہی نہیں مری جانب
یہ وفا کے مری صلے ہیں میاں
کیسے منزل نصیب ہو گی ہمیں
پاؤں میں اب بھی آبلے ہیں میاں
لے کے تصویر تیری آنکھوں میں
صورتَ نقشِ پا پڑے ہیں میاں
اس سے ترکِ وفا میں کر بیٹھا
یہ مرے اپنے فیصلے ہیں میاں
کیا کسی کا گلہ کریں ہم لوگ
اپنی تقدیر سے لڑے ہیں میاں
یہ ترے شہر کے ہیں دیوانے
بولیاں کتنی بولتے ہیں میاں
کیا پیام ان کو دوں نگاہوں سے
میری جانب وہ دیکھتے ہیں میاں
محمد اقبال پیام
No comments:
Post a Comment