نگار صبح وطن کو ذرا سنورنے دو

 نگار صبح وطن کو ذرا سنورنے دو

نہیں ہے صاف فضائے وطن ابھی لیکن

رُندھا ہوا تھا جو مُدت سے وہ دُھواں تو گیا

کرو نہ غم کہ ہے برہم ابھی نظامِ چمن

خوشی مناؤ کہ سفّاک باغباں تو گیا

دلِ حیات ابھی تک بجھا بجھا ہی سہی

مگر حیات کے چہرے کی جھریاں تو گئیں

سجا نہیں ابھی کاشانۂ امید مگر

وہ یاس کی شرر انگیزیاں تو گئیں

خود اپنے ہاتھ میں اب ہے نظامِ میخانہ

یہ اور بات ہے ہیں تشنہ کام ابھی دو چار

کچھ اور دیر تو چلنے دور ساغر کا

نشے میں چُور نظر آئے گا ہر اک میخوار

نگارِ صبحِ وطن کو ذرا سنورنے دو

ہر ایک ذرت میں سو طُور جگمگائیں گے

چمن کے گُل ہی نہیں خار و خس بھی اے جعفر

کھلیں گے، جھُومیں گے، ناچیں گے، مُسکرائیں گے

جعفر ملیح آبادی