چرا کر نظر اک نظر دیکھ لینا
محبت کا پھر تم اثر دیکھ لینا
تمہیں اپنے جلوؤں سے فرصت ملے تو
ہمیں بھی کبھی اک نظر دیکھ لینا
کسک دل میں تم کو بھی محسوس ہو گی
جو مارے ہیں تیر نظر دیکھ لینا
ڈبو دے گا اک دن سفینے کو تیرے
یہ حرص و ہوس کا بھنور دیکھ لینا
فضاؤں میں شہرت کی اڑنے سے پہلے
شکستہ نہ ہوں بال و پر دیکھ لینا
کہاں تک تڑپتا رہوں درد بن کر
کبھی آ کے زخم جگر دیکھ لینا
درد سرونجی
No comments:
Post a Comment