ہادیٔ کل جز محمد مصطفیٰ کوئی نہیں

 عارفانہ کلام حمد نعت منقبت

ہادیٔ کُل جُز محمد مصطفیٰﷺ کوئی نہیں

رحمتہ للعالمیںﷺ ان کے سوا کوئی نہیں

جس کی خاکِ رہگزرہے غازۂ مہرِ فلک

وہ نہ ہوں تو روز و شب صبح و مسا کوئی نہیں

بن گئی طیبہ کی دوری اک سمندر کی طرح

ہے تصور اک سفینہ،۔ نا خدا کوئی نہیں

شمع یادِ مصطفیٰﷺ ہے اور دل قندیل ہے

گُل اسے کر دے کبھی ایسی ہوا کوئی نہیں

آپﷺ کی نعلینِ اقدس، تاجِ سر میرا بنے

اس سے بہتر بالیقیں ظِلِّ ہُما کوئی نہیں

احمدِ مختارؐ کے قدموں میں مچلو عاصیو

چارہ سازِ دردِ عصیاں دوسرا کوئی نہیں

ناز ہے عرشِ بریں کو اس نیازِ خاص پر

تھے محب محبوب باہم تیسرا کوئی نہیں

موسمِ حج میں بھی محرومِ زیارت رہ گیا

شہرِ طیبہ سے ملی مجھ کو صدا کوئی نہیں

جان جب نکلے تو ہوں محبوب داور سامنے

دل میں ارماں ہے یہی اس کے سوا کوئی نہیں

شربتِ دیدار شبنم کو عطا کر دیجیے

اے مِرے سرکارؐ اب اس کی دوا کوئی نہیں

شبنم کمالی

مصطفیٰ رضا