اڑا لا اے صبا بوئے محمد

 عارفانہ کلام حمد نعت منقبت

اُڑا لا اے صبا! بُوئے محمدﷺ

کھِچا جاتا ہے دل سُوئے محمدﷺ

نسیم گُلشنِ طیبہ مجھے بھی

سُنگھا دے لا کے خُوشبوئے محمدﷺ

جو میں کرتا ہوں سجدہ سُوئے قبلہ

تو جھُک جاتا ہے دل سُوئے محمدﷺ

علیؑ کو دیکھ کر دیکھوں نبیﷺ کو

کہ ہے رُوئے علیؑ رُوئے محمدﷺ

جنوں کہتا ہے یہ پائے طلب سے

کہ بر خیز و برو سُوئے محمدﷺ

جو اپنی جان صرفِ آستاں ہے

تو دل خاکسترِ کُوئے محمدﷺ

لڑائے مجھ سے کیا شیرِ فلک آنکھ

کہ میں ہوں اک سگِ کُوئے محمدﷺ

خوشا عزت،۔ خوشا تقدیر حامد

کشش اب لے چلی سُوئے محمدﷺ

حامد حسین حامد عظیم آبادی