عارفانہ کلام حمد نعت منقبت
دل میں بسا کے دیکھ محبت رسولﷺ کی
ہر ہر نفس سے آئے گی نکہت رسولﷺ کی
دونوں جہاں میں جس نے کیا سرخرو ہمیں
وہ دیں ہمیں ملا ہے بدولت رسولﷺ کی
انسانیت کے باب میں سوچے عمل کرے
ہے آدمی پہ فرض یہ سنت رسولﷺ کی
ہم کو تو آندھیوں نے بھی دی ہے یہی نوید
روشن رہے گی شمع ہدایت رسولﷺ کی
نام رسولﷺ پر نہ دھڑکتا یہ دل مِرا
حاصل مجھے نہ ہو جو محبت رسولﷺ کی
سارے جہان ہی کو نوازا ہے آپ نے
ہم پر ہی اک نہیں ہے عنایت رسولﷺ کی
کیا دور ہے کہ قافلۂ اہل دہر کو
ہر لمحہ چاہیے ہے قیادت رسولﷺ کی
خاور وہ وقت عرصہ محشر کہیں جسے
ہر شخص کے لیے ہے عدالت رسولﷺ کی
رحمان خاور
No comments:
Post a Comment