وہ زندہ رہ کے دکھائے ذرا ہوا سے الگ

 عارفانہ کلام حمد نعت منقبت

وہ زندہ رہ کے دکھائے ذرا ہوا سے الگ

جو کہہ رہے ہیں کہ ہے دین کربلا سے الگ

نہ ہوں گے مر کے بھی دہلیز سیدہؑ سے الگ 

زمانہ ہوتا ہے تو ہو میری بلا سے الگ

نبیؐ سے، دین سے وہ لوگ ہیں خدا سے الگ

بھٹک کے بیٹھے ہیں جو آل مصطفیٰؐ سے الگ

ہے دو جہاں میں رُسوا حسینؑ کا دشمن 

سزا نہ ان سے الگ ہے نہ یہ سزا سے الگ

حسینؑ مجھ سے ہے اور میں حسینؑ سے لوگو

بتا دیا ہے نبیﷺ نے بڑی ادا سے الگ

بتایا ابن علیؑ نے وہ لوگ ہم ہی تو ہیں 

کٹا کے سر کو بھی ہوتے نہیں خدا سے الگ

جناب سیدہ زہرہؑ، علیؑ حسینؑ و حسنؑ

دکھائے کوئی انہیں کر کے مصطفیٰؐ سے الگ 

کٹا کے سر کو بتایا حسینؑ نے لوگو

بقا کے دیس میں بیٹھے ہیں ہم، فنا سے الگ

تو ان سے کرتا ہے نسبت خطا کی، ابنِ خطا

ازل سے رکھا ہے رب نے جو گھر خطا سے الگ

میں مر بھی جاؤں تو الطاف ہو نہیں سکتا

کبھی بھی پنج تن پاک کی ثناء سے الگ

سید الطاف حسین کاظمی