یہی بس ایک دعا مانگنا نہیں آتا
وفا کے بدلے وفا مانگنا نہیں آتا
ہمارا کام محبت سے پیش آنا ہے
کسی کا نام پتا مانگنا نہیں آتا
دریچہ کھول دیا ہے گھٹن سے بچنے کو
مگر زباں سے ہوا مانگنا نہیں آتا
کہیں ملے تو یہ کہنا مرے مسیحا سے
مریض غم کو دوا مانگنا نہیں آتا
یہ خامشی کوئی طوفاں ضرور لائے گی
غریب چپ ہیں تو کیا مانگنا نہیں آتا
ضرورتوں کے سوا بھی ضرور ملتا مگر
ضرورتوں سے سوا مانگنا نہیں آتا
ہزار بار کہا دل سے مانگ لے کچھ تو
یہی جواب ملا مانگنا نہیں آتا
ہمیشہ خیر کے طالب ہیں ہم ہمیں عالم
طلسم ہوش ربا مانگنا نہیں آتا
س۔ ش۔ عالم
سید شاہ عالم
No comments:
Post a Comment