آتش گل بن کے چمکی ہے بہار زخم دل
مظہر جشنِ چراغان ہے دیار زخم دل
اس کو پہچانتے ہیں قدردانِ بہار زخم دل
ہے بہارِ باغ سے بہتر بہارِ زخم دل
زخمِ دل دیکھا میرا تو ہنس کے فرمانے لگے
ایک مدت سے تھا تجھ کو انتظارِ زخم دل
ہوک سی اٹھی ہے دل میں اور رو دیتا ہوں میں
درپئے آزارِ جاں ہے خلفشار زخم دل
جیتے جی زہرابِ غم پینا پڑے گا مے کشو
موت سے پہلے نہ اترے گا خمار زخم دل
یوں تو کتنی ہی حسیں یادیں ہیں اے رہبر مگر
یادگارِ زخمِ دل ہے یادگارِ زخم دل
رہبر جدید
No comments:
Post a Comment