اللہ رے شان حسن خدا ساز مصطفیٰ

 عارفانہ کلام حمد نعت منقبت

اللہ رے شانِ حسنِ خدا ساز مصطفیٰﷺ

وہ ذات بے نیاز ہو اور نازِ مصطفیٰﷺ

اک بات ہے کہ ہاتھ میں باتیں کریں حجر

جنبش کرے اگر لبِ اعجازِ مصطفیٰﷺ

مرنے کو جانتے ہیں حیاتِ ابد ملی

جینے کو موت کہتے ہیں جانبازِ مصطفیٰﷺ

جینے سے جی چراتے ہیں کشتے فراق کے

مرنے پہ جان دیتے ہیں جانبازِ مصطفیٰﷺ

بگڑے ہوئے نصیب ہمارے بنائے

اف رے کرشمۂ نگہِ نازِ مصطفیٰﷺ

آنکھیں ملوں کبھی کبھی آنکھوں میں دوں جگہ

پاؤں جو خواب میں قدمِ نازِ مصطفیٰﷺ

وہ خوش نصیب تھے جو سرفراز ہو گئے

یہ سر کہاں، کہاں قدمِ نازِ مصطفیٰﷺ

حو جلوہ گر ہے چشمِ حقیقت نگر سے دیکھ

آئینۂ جمالِ خدا سازِ مصطفیٰﷺ

جی چاہتا ہے چشمِ تصور کو چوم لوں

یہ دل ہو اور جلوہ گہِ نازِ مصطفیٰﷺ

سجدے میں وہ شفاعتِ امت پہ ہیں مُصر

یہ نازِ مصطفیٰ ہے وہ اندازِ مصطفیٰﷺ

وہ کیا ہے جو نہیں مِرے مولا کے ہاتھ لطف

ہر شے پہ آشکار ہے اعجازِ مصطفیٰﷺ

مفتی اکرام احمد لطف بدایونی