عشق کام اپنا کر گیا شاید

 عشق کام اپنا کر گیا شاید

مر رہا تھا تو مر گیا شاید

منتظِر اب بھی انتظار میں ہے

تھٙک کے وہ منتظر گیا شاید

صرف ویرانیاں ہیں، وحشت ہے

ہم سفر پیشتر گیا شاید

اِک نیا درد، دل سے اُٹھتا ہے

بالیں سے چارہ گر گیا شاید

اپنی منزل پہ نقشِ پا دیکھا

کوئی یاں سے گزر گیا شاید

چاند کی روشنی بھی ماند پڑی

آج وہ بن سنور گیا شاید

زخم سہنے کا حوصلہ نہ رہا

دل گیا تو جگر گیا شاید

جس کو قلبِ سلیم کہتے ہیں

عشق کرنے سے ڈر گیا شاید

سلیم عباس قادر