حسن کو آرائشوں کا جب ہنر بھی دے دیا
دینے والے نے ہمیں ذوقِ نظر بھی دے دیا
حد تو یہ ہے بخش دی اس کو متاعِ شب تمام
روشنی کے واسطے نورِ سحر بھی دے دیا
ششدر و حیراں فلک ہے قتل بھی خود ہی کیا
قتل کا الزام مقتولوں کے سر بھی دے دیا
اس کی آمد بارِ احساں اس پہ جینے کی دعا
ناتواں شانوں پہ اک بارِ دِگر بھی دے دیا
میکدے میں غم غلط کرنے جو آئے شیخ جی
ساقیا اک جام تیرے نام پر بھی دے دیا
اس سے کیا لےگی زمیں ہر قطرۂ خوں کا حساب
جس نے اک اک اپنا حرفِ معتبر بھی دے دیا
رنج کا خوگر بنایا اک طرف اس نے شمیم
دوسری جانب دعاؤں میں اثر بھی دے دیا
شمیم زمانوی
No comments:
Post a Comment