عارفانہ کلام حمد نعت منقبت
پہلے ثنائے خالق کون و مکاں کرو
پھر وجہِ کائناتﷺ کی مدحت بیاں کرو
اصحاب مصطفٰیﷺ کا کرو دل سے احترام
آلؑ نبیﷺ کی یاد سے دل ضوفشاں کرو
گر چاہتے ہو زیست گزر جائے چین سے
پہلے درود پاکﷺ کو وِرد زباں کرو
بہہ جائیں گے گناہ سبھی سیلِ آب میں
آنکھوں سے اپنی اشکِ ندامت رواں کرو
کیوں فکر زادِ راہ؟ میسر ہو غیب سے
تم اپنے دل میں قصدِ مدینہ جہاں کرو
طیبہ سے ہو کے جاتی ہے خلدِ بریں کی راہ
لازم ہے پیرویٔ شہ دو جہاںﷺ کرو
حسنینؑ کے وسیلے سے مانگو دعا شمیم
نم دِیدہ ہو کے ہاتھ سُوئے آسماں کرو
شمیم زمانوی
No comments:
Post a Comment