کچھ زخم مری روح کے گہرے بھی بہت ہیں

 کچھ زخم مِری روح کے گہرے بھی بہت ہیں

کچھ دل پہ تِری یاد کے پہرے بھی بہت ہیں

کچھ دب گئی مظلوم کی آہ ہنسی میں

کچھ لوگ مِرے شہر کے بہرے بھی بہت ہیں

بہہ جائیں گے برسات میں، یہ دیکھتے رہنا

پلکوں پہ تِری خواب سنہرے بھی بہت ہیں

دیکھا نہ کوئی آپ سا ہم نے تو جہاں میں

نظروں میں رہے چاند سے چہرے بھی بہت ہیں

ہر چند کہ قانون کے پابند ہیں فائق

قسمت میں عدالت کے کٹہرے بھی بہت ہیں

شہباز رسول فائق