وقت کی ریت
وقت کی ریت جب آنکھ میں چُبھتی ہے
تو محسوس ہوتا ہے
بُدھا تو سچ کہتا تھا
میرے ہونے کا احساس
سردی میں کپکپاتا ہے
رات کی آنکھوں سے خُون کے قطرے
صُبح تک ٹپکتے رہتے ہیں
شام میں ڈُوبتے سُورج کی سُرخی سے
خارش کی وبا پھُوٹتی ہے
جنگل میں راہ بھٹکے پنچھی
برفانی موسم کو کوستے ہیں
ہم اپنے کانوں میں رُوئی ٹھونسے
ہیرا منڈی سے ایسے گُزرتے ہیں
جیسے کوئی جہنّم ہو
جن کے قہقہے سُننے سے
ہم بہرے ہو جائیں گے
حالانکہ ہماری آنکھوں سے شہوت
شاہراہوں کے بدن کو نوچتی ہے
ہماری زبان کا جلاد
غمزدہ چہروں کو کاٹتا ہے
غریب بستی سے گُزرتے ہوئے
ہم ناک پر رومال رکھ کر
بُدھ کی باتوں کا اعتراف کرتے ہیں
جب کہ فرشتے ہم سے نالاں ہیں
فطرت ہم سے روتی ہے
حفیظ تبسم
No comments:
Post a Comment