شب غم سے ترے جان ہی پر آن بنی تھی

شب غم سے تِرے جان ہی پر آن بنی تھی

جو بال بدن پر ہے سو برچھی کی اَنی تھی

شب گِریہ سے وابستہ مِری دل شکنی تھی

جو بُوند تھی آنسو کی سو ہیرے کی کنی تھی

بے دردی ہے فرہاد سے نِسبت مجھے کرنا

آخر یہ جگر کاوی ہے وہ کوہ کنی تھی

میں کُشتہ ہوں اسباب کا تیرے شہدأ کا

گر چلتے میں کچھ ساتھ لیا بے کفنی تھی

یک عمر رکھی غرق بہ خوں چاکِ گریباں

ہم کو بھی کبھو خواہشِ گُل پیرہنی تھی

اب گِریہ تعجب ہے تجھے لختِ جگر کا

اِک وقت تو یاں کانِ عقیقِ یمنی تھی

قائمؔ میں غزل طور کیا ریختہ، ورنہ

اک بات لچر سی بہ زبانِ دَکھنی تھی

قائم چاند پوری