ایک ٹہنی سے برگ ٹوٹا ہے

ایک ٹہنی سے برگ ٹُوٹا ہے

ساری شاخوں سے خُون پھُوٹا ہے

اب تو قسمت پہ چھوڑ دے ملنا

تیز پانی میں ہاتھ چھُوٹا ہے

میں نے پھُولوں پہ ہاتھ رکھا تھا

کیوں ہتھیلی سے خُون پھُوٹا ہے

وقت کر دے گا فیصلہ اس کا

کون سچا ہے،۔ کون جھُوٹا ہے

ہسنے والے کو کیا خبر اس کی

مجھ پہ کیسا پہاڑ ٹُوٹا ہے

اس کے فن میں تو شک نہیں لیکن

یہ بھی مانو وہ شخص جھُوٹا ہے

میں کہوں بھی تو کون مانے گا

جس کمان سے یہ تِیر چھُوٹا ہے

کس کو توقیر ؔیہ خبر ہو گی

کس تعلق سے اس نے لُوٹا ہے

توقیر عباس