یار کو رغبت اغیار نہ ہونے پائے

 یار کو رغبتِ اغیار نہ ہونے پائے

گلِ تر کو ہوسِ خار نہ ہونے پائے

اس میں درپردہ سمجھتے ہیں وہ اپنا ہی گلہ

شکوۂ چرخ بھی زنہار نہ ہونے پائے

فتنۂ حشر جو آنا تو دبے پاؤں ذرا

بختِ خفتہ مرا بیدار نہ ہونے پائے

ہائے دل کھول کے کچھ کہہ نہ سکے سوز دروں

آبلے ہم سخنِ خار نہ ہونے پائے

چپکے وہ آتے ہیں گلگشت کو اے بادِ صبا

سبزۂ باغ بھی بیدار نہ ہونے پائے

پھر کہیں جوش میں آ جائیں نہ یہ دیدۂ تر

سامنے ابرِ گہر بار نہ ہونے پائے

باغ کی سیر کو جاتے تو ہو پر یاد رہے

سبزہ بے گانہ ہے دو چار نہ ہونے پائے

جمع کر لیجئے غمزوں کو مگر خوبی برم

بس وہیں تک ہے کہ بازار نہ ہونے پائے

آپ جاتے ہیں اس بزم میں لیکن شبلیؔ

حالِ دل دیکھئے اظہار نہ ہونے پائے

شبلی نعمانی