مژدہ اے دل کہ مرے پاس وہ یار آوے گا​

مژدہ اے دل کہ مِرے پاس وہ یار آوے گا​

خاکِ راہ اس کی بنوں گا وہ سوار آوے گا​

اس لیے صید گہِ عشق میں ہم صید بنے​

کہ کبھی صید فگن بہرِ شکار آوے گا​

دیکھ اے دل تُو نہ پی جامِ محبت کی شراب​

بے مزہ ہووے گا، جس وقت خمار آوے گا​

دم لبوں پر ہے مِرا،۔ آ جو تجھے آنا ہے​

مجھ کو کیا گرچہ پس از مرگ ہزار آوے گا​

تُو جو آئینہ صفت غیر سے ہو جائے گا صاف​

تیری جانب سے مِرے دل میں غبار آوے گا​

یہ یہیں تک ہے گلہ کہنا نہیں کوئی ہمیں​

گنتیاں بھولیں گے جب روزِ شمار آوے گا​

لے گیا ایک ہی بار آنے میں دل اپنا ظفرؔ​

ہو گا کیا دیکھیے جب وہ کئی بار آوے گا​

​

بہادر شاہ ظفر